زمان

• نايف سليم
• 21/03/2019
• نسخ الرابط

"شو هالزمان اللي وصلناله"؟

والظلم فوضى فيه.. وسارح ع فيّالُه

والأبريا بتقتّلوا وبتجرّحوا فيه.. والمجرم مقدّس.. واللي حواليه

وصوت العدل أخرس من الأخرس

وجيالنا.. وصحابنا.. يا حسرتي.. راحوا

وكثار هالأيام بيقولوا: اللي راحوا استراحوا

وعاميسنا وعاتيننا صوت العصافير انقطع

ومزراب أوجاع بقلب قلبي شقع.. وأخبار نار ملهلبه منسمع.. ويوميًا

بترعب وبتسرسب مثل غوله.. وأفظع من الغوله

وبالإيد ما بطلع.. إشي شيله.. وكليًا

وألفين حسره.. لو الأعوام هالإيام..منقدر نبدّلها..بساعة طفوله..

وحرام ..عيون ..وكثيره ..تظلّأ هيك..بالدمع مبلوله.

 

/ غايب

غايب عمر ..وخبار مقطوعه..وإمُّه بكت تانشّفوا دموعا

وغابت مثل إبنا عن العالم..ومره بتوعا وشي ثلث مرات ما بتوعا.

 

/عودة

وقالوا الغايب لفا..ويا عين حاجي بكا..ويا لسان حاجي نوح

ويا قلب إمه اللي انطفى..وتخرسنت وانهلّ دمع العين لمّن شافتُه مذبوح.

 

/صريخ

كانت غطيطه مادّه ..وليله الطبيعه شادّه..وبرق ورعد والمطر نازل زخ..وسمعت صريخ وصوت عال..قال سامي انطخ

إبنا وحيدا اليتيم ..تبلكمت ما قدرت تعبر عن وجع حتى بكلمة أخ .

 

/ حاله!

طخوا الشهيد حسين بالعين وعن بعد مترين..والريح كانت تصيح..والدنيا تشتّي زخ

والشبّان حملوه تحت الطخ وأخته الجريحه انحنت وتصيح ويلي أخ

وتبوّس برجليه ..وظلّت حاضنه رجليه..تاصفرنت.

 

/ البيت

قالت بحسرات ومدامع محرقه: شو نفعت سنين الشقا؟واللملمه والصرّ والتقتير:

تيصير عنّا بيت؟ وشو نفعت الآهات والحسرات والياريت..

من بعد هدم البيت؟.

 

/ ليلة

لما شفت إمي ..وهي ساخنة..وبغفوتا ..كانت تنقّط دمعتا ع مخدّتا

ما نمت شيله ليلتا.