أشعار حميمية.. | نايف سليم

• نايف سليم
• 09/10/2022
• نسخ الرابط

 1

لما سمعت امي وهي نايمه حدّي ع لمخده وهي ساخنه تبكي وكانت تنقط دمعتا ع مخدتا ما نمت شيله ليلتا...

 

2

وكل ما سمعت شي دب..بفطن بوقعة وفاء ودمعنا المنصب وجمعه بظل من الأسى نايم ع وجهي طب... 

 

3

كل ما هبت بوجهي الشراقي بحسّ بنار تلهب بأعماقي وبفطن بالمصيبه اللي صابتنا وكأنه حبل بزرد على خناقي...

 

4

والورده شوموجوعه وعميكرجوا ع خدودها دموعا والريح عمبتصيح وبتصفر ع اللي بقتّل أبريا وبؤمر...

 

5 

كان السطح عالي وبفية الداله متلقّح حسين وغارت الطياره ونزل السطح وحسين والداله وتصيح ام حسين طوّالي :يما يا نور العين شو صار بيحالي؟ وتغرق بدمع العين...

 

6

كانت غطيطه مادّه وليله الطبيعه شادّه وبرق ورعد والمطر نازل زخّ وسمعت صريخ وصوت عالي قال إبنا انطخ إبنا وحيدا تخرسنت ما قدرت تعبّر حتى بكلمة أخ...

 

7

غز العلم واهتز من فرحته العامود وسمعوا طلق بارود وصاح الرفاق انقتل محمود والريح ولولت تحتج وظل العلم خفاق والعامود...

 

8

كنا واحنا زغار يوم العيد بس نفيق نركض ركض تانوصل الصديق والصديق للأولاد كان البحر والمينا ونلعب لعب ننسى أساميها وننزل تحت ع العين نسبح كلنا فيها ومرات بأواعينا...

 

9

عمري مضي حسره ورا حسره ع اللي مضي وع اللي بقي مرغوب

ومن بعد موتي ما الي مطلوب بالمره إلا ولو مره يموت الفقر مثلي والظلم بالمره ..مره..ولو مره...

 

10

ما في إلي مطلب عقب ما موت يفرحني ويفرح معي التابوت إلا يموت الذل والحرمان ويرجع حدا لنُّه حدا من أهلنا الغياب للأوطان...

 

11

هالدار تعميرا أخذ جهد العمر وسنين وقرضه ودين وصعب سدّ الدين واليوم ويلي آخ هدّوها بلحظة عين وعمبسألونا ليش انتوأ مقاومين؟...12

غايب عمر وخبار مقطوعا وامه بكت تا نشّفوا دموعا ومره بتوعا وشي عشر مرات ما بتوعا...

 

13

قرروا في المحكمه هدم العماره كلها وبعد الهدم يومين لاقوا سعاد اليتيمه العمرها سنتين تحت الردم ومقطعه الإيدين...

 

14

يا عين حاجي بكا ويا لسان حاجي نوح والغايب لفا ويا قلب امه اللي انطفى وانهز لمن شافته ملقوح مذبوح...

 

15

قال شاعر:

 وطالب العدل من أفضال دولتكم كطالب الشهد من أنياب ثعبان...

 

16 

وقال آخر:

من كان يكسو الكلب وشياً ثم يقنع لي بجلدي الكلب خيرٌ عنده مني وخيرٌ منه عندي...

 

17 

وقال آخر:

ما بدينا والمدامع في عنينا ولو بدينا نمسك مواج المدامع في عنينا ما بكينا...

 

18 

وقال آخر:

في قرانا إنما نغمض عين الميت حتى لا يرانا...

 

19 

وقال آخر: عصفور عابابي مرق باكي ونقّطوا دموعه ع شباكي...

 

20 

وقال آخر: في ناس قالوا انجرح في ناس قالوا مات في ناس قالوا فتح عتمة خيالُه وفات...