يا أهلنا...

• نايف سليم
• 17/10/2019
• نسخ الرابط

يا طيور حاجي ترفرفوا عسطوحنا

ويا صخور حاجي تلمعوا ع سفوحنا

ويا عيون حاجي تدمعوا ع جروحنا

اليوم اختلط مجموعنا بمقسومنا ومضروبنا بمطروحنا

وصرنا عجايب

يا أهلنا حاجي نقتّل بعضنا..وحاجي تناويح

صرنا ضحايا رمايا تِخْجِل التاريخ..وتصيح فينا الريح:

بكفيش هدم العدى لبيوتكوا..والقتل والتجريح؟

يا بشر لا تِقِلْبوا معزى وغنم للحلب والتذبيح

والحيط عايب..!

يا ليل شدّ ومدّ بلكي تنسّينا مآسينا

وصار النهار خبار..كُلاّ نار..تكوي كلاوينا

وعيب الضحايا هيك..ينشغلوا ببعض..وينسوا العدى شو بعملوا فينا..وصار البعض يا حسرتي يهدي اعادينا:

شُبّان مثل الحبق..قتلى بأيدينا

ودورُن خرايب

يا اللي بادين ببعضكوا..وناسين حكّامكوا الظُّلّام

ويا زُمَرْ ماشي لورا ومتفرعطه..شو كِنّْكوا نسيتوا تمشوا لقدام؟

وفي فرْق بين الأهل والعدى..وفي فرق بين العدل والإجرام

ويا مضيّعين الهدف والحال والآمال والأحلام

طخّ وقتل كليوم..وطفاش..والله حرام..والله حرام

خلّوا غراب البين..يغمض عين..نتفه ينام..بلكي بينسى ويلتهي عن حقنا الغايب..ولو يومين..

ويلي آخ يا شعب يا قلب ياعين..حقك وين؟ ضايع وين؟

وسايب..على أهون سبايب....