بين عين كارم وعيلبون

عزائي لكم أيّها الجميلون برحيل الزّوج والأب، الأخ والجد الجميل الذي ملأكم بالجمال فأحاط بكم من كل صوب، واثق بأنّكم على قدر المسئولية تدركون أنّه يراكم وأمنيته أن تحافظوا على كل هذا الجمال داخل قلوبكم ومحيطكم فترتاح روحه بسلام ويتكثّف حضوره الجميل بينكم.

 كان لفقيدكم الغالي الأستاذ فضل نعيم زريق الفضلُ الأوّل في تمكّن خالي د.عمر الخطيب رحمه الله من زيارة مسقط رأسه بعد أكثر من خمسين عامًا على التهجير ومقتل أخيه برصاص الصهاينة داخل غرفته. أعتقد أنها مهمّة إنسانيّة، وطنيّة وتاريخية من الدّرجة الأولى إن دلّت فإنّما تدلّ على شهامة وأصالة نال خالي من فيضها.

 أستجمع ذاكرتي لأخطّ كلمات خالي عمر (أبو عزّام) حول تلك الزيارة كعربون شكر للعائلة وللسيّد فراس الذي وثّق الزيارة بألبوم صور التقطها ودوّن مكان وزمان كل صورة لتبقى لدينا ذكرى الخال في عين كارم.

• "هذا الرجل وعائلته الكريمة أهدوني هديّة العمر، رتّبوا لي زيارة عين كارم، شي ما بيخش المخ، رجعت سمعت جرس الكنيسة جارة بيتنا اللي كنت أدقّه وأنا صغير بطَلب من الرّاهبات وكاهن الدير.

•  مشيت بالبلد... مش أنا اللي عم بمشي وبحكي وببكي، عمر ابن الـ 12 سنة هو اللي عم يمشّيني ويدلني ع طريق الدار، تعربشت ع الحيطان اللي مغطية البيوت أدوّر وأشمشم هوا بيتنا لحد ما شفت البير اللي كانت حياة إمي تنشل منه المي للري والغسل والشرب فتأكّدت إنه هذا بيتنا، شفت شجرة الليمون بجنبه، بعدها مكانها صامدة ومليانة حبّات صفر كبار، قطفت حبة شمّيتها فأخذتني لزمن تاني.. يحكوني ما أسمع، ينادوني ما أرد، أنا هون ومش هون. تركوني أتصرّف براحتي وما ضايقوني وكانت الدموع بعينيهم، كمّلت باتجاه الباب بدّي أفوت ع بيتنا، ناداني أبو فراس: وين رايح استنّى شوي. ليش استّنى؟ بدي أفوت على بيتنا ما صدّقت رجعت ولاقيته!!

•  فيه ناس ساكنين لازم نستأذن منهم...

•  أستأذنهم حتى أفوت ع بيتنا؟!

• حكم القوي يا أبو عزّام يا حبيبي، قال صديقي محمد البطراوي أبو خالد رفيقنا بهالمشوار الحلم.

 

دق أبو فراس ع الباب طلّت يهودية وجهها بينقط سم، حاول فراس وأبوه يشرحولها بالعبري...بس ما فهمَت حاولوا يطلبوا منها بالعبري.. بس ما وافقَت هدّدتنا بطلب الشرطة..برضو بالعبري.

 ما بعرف كيف طلعت من حوش الدّار بس بتذكّر إنّي قطفت كمان حبّة ليمون وتنشّقت ريحتها وريحة أخوي الشهيد، حطّيتها بجيبتي ومشيت ما بعرف مين بمشّيني وما بعرف بشو حاسس

مشيت وعندي حنين الدّنيا كلها وبعرف لمين.

كنت بحاجة أشرب عرق ولازم أشرب عرق وإلّا راسي بينفجر..

دوّرنا ع مطعم عربي عنده عرق بعين كارم، قعدنا وشربنا،

شربنا كاسك يا وطن، وكتبنا إسمك يا بلادي ع الشمس اللي ما بتغيب، بس غابت الشمس، غابت وإحنا بعين كارم وأنا مش مصدّق ومش فاهم اذا أنا بحلم أو بعلم أو بكابوس!!!

وتخيّلوا يا ولاد إنه فراس حامل كامرته بصوّر فيّ بكل لحظة وكل موقف وإنّه حمّض الأفلام ورتّب لي الصّور بألبوم كتب عند كل صورة زمانها ومكانها وكلمتين يوصفوا حالتي ساعتها وأعطاني إيّاه قبل ما أرجع على عمّان، وفراس أخذ عطلة أسبوع وأخذنا بسيارته رحلة عمري، 

صاحبي فضل أخذ حجر وحفنة تراب من حاكورة بيتنا أعطاني إيّاهم لمّا صحيت.

الست كاميليا قطفت خبيزة من أرض عين كارم طبخت لي إياهم تاني يوم بعيلبون وكانت أطيب لقمة باكلها بحياتي وكان هذا أهم أسبوع بحياتي العامرة بالأحداث".

لكم الصّبر والسّلوان ولفقيدكم الرّحمة والاطمئنان.

 

*مخرج ومدرب تطوير قدرات - عمان