سَنَة وْسَنَتين/ خواطر غنائيّة| نمر نمر

-هي: أسْعد الله فجرَكَ! يا نايم وَحِّد الدّايم، طِلْع الصّباح وْلَك علّوش، سبْقونا الحصّادة / جيب المَنْجِل والمنكوش والحقني بالزّوّادة...

-هو: يا صباح الخير يالّلي معانا، غنّى الكروان ويّانا، يا هلا بالّلي جانا، يا هلا وْمرحبا، حيّاكُم الله وْحيّى الثائرين/ يوسف حسّون.

 هي: بدون مقدمات، بِلا لفّ ودوران: عالياني الياني/ عاللّي راح وما جاني/أسْهر الّليل بْطولو/ ولّعْ قلبي وْرماني/ يا ويلي ويلي ويل يَمّة/ ويلي ويل بويَة/ عالّلي راح وخَلاّني...

-هو: يمكن هاي كلمات وألحان الشّاعر: داخل حسن وغناء: زينة صقر، دلال الشّمالي، يحيى صويص، نوار الحسن...

-هي: هذه ليست معلوماتِكَ، ولا ذاكرَتَكْ الني أصبحتْ في طّيّ النّسيان والضّياع يا عبد الله!

-هو: والله مَعِكْ الحقّ يا بنت الخال، بَعْدِكْ عالبال، خلّيني أقولِّكْ: سَنَة وْسَنَتين وانتّ يا فلبي تْقول أنا فين/ يا مصر يا نور العين....، أين مصر اليوم، كان وأخواتها، وإنَّ وعمّاتها وخالاتها في هذا الزّمن الرديء!

-هي: رْجِعِت تِجْتّر شادية وفريد الأطرش إلّلي مرّ على رحيلو خمسة عقود بالتّمام والكمال، أنا دايرة بالي مْنيح، وان كَنّكْ مشْ متأكّد، إسأل ...

-هو: والله وْجِبْتيها وْلقطْتيها عالطّاير يا حَمام الدّوح غرّد يا يمام، جايين يا أهل الوطن جايين/ اشْتقنا لْجبل (عَلْما)، اشْتفنا لْجبل (شُفْنين)/ تحت السّما ما في مثل (كنعان)/ كنعان أعلى جبل بْأعلى جْبينّ.

-هي: الله يْثَبِتْ عليك العقل والدّين، صُرْت تْخربط يا ابْن الحلال، وْتخلط شعبان بْرمضان، لا تسرح بعيد، خليك قريب، لا تْخوّفني عليك، يمكن حبوب الدّوا عمّال تْأثّر عليك، قَلّل منها ولا تشغل بالك عالطّالعة والنّازلة، كُل شي قسمة ونصيب، أركض ركض الوحوش غير رزقك ما بتحوش.

-هو: الله وكيلِك، أنا مش مخربط، أنا عمّال أقصّر المسافات، والمسافة بين وادي القْصير وْخربة السّْدير مش بعيدة، وجبال: حوران، لبنان وكنعان هي تَتِمّة لبعضها البعض في جزيرة الشّام كما يقول الموحِّدون في موروثهم الرّوحي، وأنا عمّال أقَصّر المسافات بينها، وْكُل شي قرضة وْدين حتى دموع العينين، زي ما بيقول ابن إبل السّقي عمي سلام الّلي زرنا بقايا بيتو سِنْة الـ 1982، وِتْذكّرنا حكاية ضبع حرفيش وْأبو كايد.

-هي: مَرْمَر زماني يا زماني مرمر/ مرمرتني لا بُدّ ما تِتْمرمر/ لا بُدّ ما تِتْحَسَّر... والزمان هو الذي مَرْمَرَنا نحْن الإثنَين معاً، و: أروح لِمين وأقول يا مين يِنْصِفْني مِنَّكْ...

-هو: يوم وْيومَين وْجمعة وْشهر وْشهرًين/ تِعْبِتْ بعَيني الدّمعة، وَيْن غايب وَيْن..

-هي: شهر وْشهرَين وْبَعْدَك بتقول محافظ عا وعدك/ والوعد يْطول.

-هو: عالعالي طاروا وْعَلَوا جَوْز حْساسين/ حْساسين وْراحوا وْعلّوا بْعُبّ الشّرْبين.

-هي: جينا لعندَك شهر ما كُنْتْ تْطُلّ/ وْظَلّ الشّوق الّلي مْسَهّر دمعات العين.

-هو: شو عْملناها مثل فيروز ونصري شمس الدّين، إسّا بِلاحظوا علينا القرّاء والنّقاد المنقودين! لا تندهي ما فيه حدا/ عَتْم وْطريق وْطَير طاير عالهدى...

-هي: بابُنْ مْسَكّرْ والعشب عالدّراج/ شو فَوْلْكُنْ، شو قولكن صاروا صدى

-هو: مع مين بَدكْ ترجعي بْعَتْم الطّريق/ لا شاعلة نارُنْ ولا عندِك رْفيق... /

-هي: يا ريت ضوّينا القنديل العتيق بالقنطرة/ يمكن حدا كان اهتدى، وما فيه حدا

-هو:غير السّما وغير المدى ما فيه حدا...

هي: ما بدّي تِعْمَلّي مونولوجات ولا اسكتْشات، ولا حِواريّات ولا جداريّات ولا ثنائيّات، ولا دْوايْتات، ولا مِنّكْ ردّة ومنّي ردة، عْمِلْتِلّي إيّاها زَيْ عريشة الأفندي عبد القادر الصّفدي قبل الثّمانة وأربعين، تشريف بلا تكليف، والعريشة كانت مَحَلَ الصّبْرة الخضاريّة اليوم حدّ البيت! مرمرّتِلّي ريقي وانتي تْلِفّ وِتْدور عالفاضي، قوم إعْمَلّي كاسة شاي خلطة من زهورات الجْنينة إلّلي عابدها عبادة بعد هالغيبة، لا تنسى المردقوش، الزّوفة البرّيّة، دُقّة العدس، الجعساس، النّعنع البلدي، روح النّعنع، نعنع الوادي والزعتر البلدي والفارسي والوردي، والّلمّانة، هاي الخلطة بِتْرّوّق الرّاس وْبتهدّي الأعصاب!هاي مِشْ طبيخ نَوَر، معاذ الله.

-هو: سمعاً وطاعة، مِيْة طلب مثل هالطّلب، تُؤمُر عالرّاس والعين...

-هي: هو هو علينا، رْجِعْتِني لحكاية: حيّكْ منديلو والاجترار وطولة المشوار، تيتي تيتي مثل ما رُحتي جيتي، الله يْجيبِك ياطولة الرّوح نقطة سطر جديد، هون حَطّْنا الجمّال، عندي اعتراضات عديدة.

-هو: أنا جاني طيفَكْ في المنام، ما حْلاه يا وعدي

-هي: يا سعد لو تشوفو، ليش عذّبني

-هو: راح الّلي راح،مَلّيتيلي القلب جْراح

-هي: أراكَ عَصِيَّ الدّمع شيمَتُكَ الصّبْرُ

-هو: تفضّلي قولي، أنا مش رقيب عسكري، ولا حامل المقصّ!

-هي: ليش بعد البيت مْحَطِّطْ مثل ما تركتو قبل سنتين: المْحكِّة الخشبيّة الطّويلة بعدها ملقوحة عاشّبّاك الشّمالي، طقم أسناني بِعِلِبْتو، الكمّادات، ألّلصقات، علاّقة أكياس شطف الرّئتَين، كروات الضّغط باليدَين بأحجامها المختلفة، أوراق النّقد ألأجنبيّة ما زالت في ألدُّرج، المناشف بأحجامها وألوانها تشكو من الوحدة وقلّة الاستعمال، ملابسي بحاجة إلى تهوئة، ليش قطعتوا الخميرة البلديّة من البيت! الميزر وين دهدرتوه وْخفيتوا آثارو وصار في خبر كان يا مكان في قديم الزّمان وسالف العصر والأوان، وقائمة الاعتراضات إلى ما لا نهاية، العَتَب على قدّ المودّة والأمليّة، وانا مالي ولخولةَ أطلال، قِفا نبكي، أمِنْ أُمّ أوفى دِمنة لم تكلّم... بْنفس الوقت خلّوني أشِدّ على إيديكو: مَهَّدْتولي الطريق وْصَبّيتوها بطون لعند دار شكري، بَسّ ظَلّتْ قُطمة زغيرة لدار سِلمي، غَصّيتوا فيها! ليش البنات إلّلي برّيت البلد، والّلي في البلد قَلَلوا زياراتهن لَعند إمْهُن من دون عادة! إصحا تكون عمّال تْكَشّر بِوجوهّنْ أو تِسْتَثْقل مِنهُنْ!! بَغْضَبْ عليك ليوم الدّين!! وقد أعذر مَن أنذر!! دير بالَك أوعا تِعْملها أبداً، هذول بناتي، وْهَمّ البَنات للممات يا ابن الحلال، وأنا بعرف كمان إنّو الوْلاد مِشْ عمّالين يْقَصْروا معاك أبداً في المشاوير والمناسبات والواجبات، دايماً حاضرين سِنْجة طَقّ، هذول فَتْحِة عين إلنا، ولاد، بنات وْأحفاد، وسام جَمَل المحامل، هَمّها كْبير وْمِش عمّال تْقَصِّر في البيت أبداً، وصفة شاي الأعشاب عربيّة أعجميّة، زَيّ الباذنجان البلدي والعجمي، وْشارع العجم/ الفُرْس في حيفا، قريب على شارع المتنبّي، وْدرج عصام العبّاسي وْقصيدة عليا وعصام للمعلوف المألوف:

رُلى عربُ قصورهم الخيام/ ومنزلُهم حَماة والشّامُ

ذَكَرَني بها صديقك فتحي الفوراني الصّفدي في مقاله الأخير في الشّذى الكرملي، له الشّكر والتّقدير.

 ما كسر ظهري غير نْواحة: أُمّ سعيد وْأمّ عصام الجَنَاوِيّات النادبات:

حاجي تْعِنّي يإ أمّ ... ملَيتي البيت عَنين/

إن كان عنينِكْ عَ بناتِكْ، فوق راسِك قاعدين/

إن كان عنينِكْ عً وْلادِكْ، راحوا يجيبولِكْ حكيم/

وان كان عنينِك ع َ بو... آ ه يا صبرٍ جميل/

أنا عمّال أتْمَهْمَج كثير تَأزورهن وْأشكرهن على معروفهن، لكن مش عمال تتقَطّع معي، ولا عليك أمر، وَصِّلْهُن سلامي وتحيّاتي وشكري على جَبْرة خواطرهن لي ولأسرتنا جميعاً، وْيا مرسال المراسيل، إنتي وحفيدتنا رنا وأولادها، الجيل الرّابع: عالضّيعة القريبة/ وَصِّلّي بْدربك هالمنديل...

-هو: هوب هوب! وقفي، وقفي، أنا حَبّ عليّ يْطُلّوا البنات والأولاد علينا كُلْهُن يوميّاً!ّ كُلّ العيلة بْفرد ليلة، مْنيح إلّلي طلعتْ مِنّكْ مش منّي، وْمِن ثِمِّكْ يا كَحلى أحلى...

-هي: العادة عندَك غلاّبة، وأنا مِن الغَلابَة يا زمن الشّقْلَبة، بعض كلماتكْ بلسم الرّوح، بَسّ بْتفتح جروح:

 يا فلبي يا مجروح أصبر على المقسوم/ /باب السّما مفتوح لدعوة المظلوم.

على فَطْنة شُفْتَك مْيَبّس التّوتّين الشّاميّات بِنَكْهتهما العالميّة المُميّزة، نْسيت شو كُنْتْ تغنّي مع بو عرب إبراهيم الصّالح السّجراوي:

يا توتة الدّار صَبْرِكْ على الزّمان الجار/ لا بُدّ ما نْعود مهما طوّل المشوار يابا

حَلَّفْتِكْ بِرَبّ الكون/ لا بُد ما نْعود مهما طوّل المشوار

هَدّي يا بحر هدّي طَوّلْنا في غيبِتْنا/ وَدّي سلامي وَدّي للأرض الّلي رَبَّتْنا

سَلِّمْلي على الزّتوني وْعلى أهلي إلَلي رَبّوني...

التوتّين كانوا حدّ الجوزة الشّاميّة والزّهرة الشّاميّة الصّفرا، إلّلي أهدتنا إيّاها إم غالب: جميلة طه/ فاعور الكابوليّة السَّبلانيّة، وْبِنت تسعين مرجوعها لأهلها، وْقبل التّجفيف/التّيْبيس أنتي زرعت منهن شَتِلْتين عايشات، بجانب دارَي شكري وسلمي، وْبارك الله في البيت إلّلي بيطلع منّو بيت، والّلي خلّف ما مات! والشّام العَذِيّة بِتْظَلْها وَفِيّة، سَخِيّة، وْكُلّنا على هالمِسير نْسير، وْعالشّلوش تنمو الشّجريّة، وْإيدَكْ خضرا وِشْفيّة، صّفّي النّيّة وْنام في البرِّيّة، وْمثل ما قُلّتِلّكْ: غيبتي قريبة مِشْ بعيدة، لن أقول لكَ ما شَدَتْه كروان:

ما تْقولْشِ كُنَا وْكان...

-هو: مِن شان الله لا تْكَمّليها، هاي بْتِقْطع الظّهر، وْبِتْزعْزِع المفاصل مثل ضربة الفاس بالرّاس وْخَمّادة الأنفاس.

-هي: ولا بَقولَكْ: حَسيبَكْ للزّمن، كما تقول ثومة المرحومة، بْنفسي أعجِن عَجْنة كبيرة مع خميرة بلديّة عالأصول، وأتْفَنَّن في خَبْزها عالصّاج الحَطَبي، مِشْ الكهربائي إلّلي بيروّحْ نكهة الخبز البلدي العربي الأصيل: خُبز مْدَوّرْ عالبيكار، مشاطيح عا هبوب الرّيح، وِ عاعوينات البقرة عالسُّفْرة، دَعابيب أطْيَبْ مِن الزّبيب، من هون لَلّزيب حَبْل الغِوى ممدود، طلامي عالأماني، وْلُزَّقِيّات  بالسُّكّر مْحلّيات، وْفطاير كِشْك بلدي أطْيَب من المِسْك، تْسَلَّقْتْ من الحكورة: سبانخ، سِلْق، نعنع الوديان، مْصارينة، مع بصل أخضر، كُلّها طالعة فبل أوانها عَ نُقَط نباريج المَيَ، في تشارين  صيف ثاني، والمَعطي كريم، خليكوا تِشْبعوا وِتْحُطّوا عاعينيكو، وان الله طعمكوا من بابو هالكريم! طَعْموا غيركوِ، والله يطرح البَرَكة، شُفْتْ قي الحاكورة كمان: بيت لسان الثّور مْلَهْيِن،هذا بَسْ للقَلي مثل العكّوب، وْحدّو بيوت الحُفحاف اللي ورقو ببِلْتَف مثل ورق الدّوالي واحنا نْمَيّز بين الصّنفين، وكمان شُفْت بيوت الحُمّيض، سبحان الخالق بِتْسَبْحو في جلالو وْهذا قَبل أوانو.

على فَطْنة قَبِل ما أنسى: ليش بَعْدَكْ خاضع لَلْحُقَن الطّبّيّة في عينيك الثّنتين، وانْتقلت من مشفى صفد لمشفى نهريّة، أنا موجوعة عليك كثير، صُرْت ماخذ تُسَتَعْشر إبْرة في كُل عين، وْكُلّو مثل إلْكَيّ عالجْلال، بلا مؤاخذة، إرْحمني وْطَمِّنّي، مرّة بِتْهنّيني وْمرّ بِتْبَكّيني. الفرق بيننا: أنا مفقودة موجودة وْإنتي موجود منبوذ! وانا بّسّ غيّرتْ قميصي إلّلي إتّسَخْ، كما يقول كبيرنا كمال جنبلاط، وْخَلَص إسّا بِسْتَعْوْقوني كثير، وْبيصيروا يْدَوّروا عليّ، بِقِلْبوا الدّنيا عليّ فوقاني تحتاني، خلّينا نِتْقِق وْنفْترِق مع الرّحابنة:

  يا قلبْ آخِرتا معكْ تَعّبِتْني/

 شو باكْ دَخْلَكْ صُرْتْ هَيْكْ وْشو بِنِي/

يا ريتني شجْرة على مْطَلِّ الدّني/

وْجيرانا غير السّما وْغير المدى/

وما في حدا... وَحَشْتوني-------ي

-هو: هونْ حطّْنا الجَمّال، غداً نلتقي مع ابن الطّوشة!! 

هي: القرار إلي، موسم الزّتون السّنة كثير منيح، الله يطرح البَرَكة، من الشّجر للحجر، يعطيكوا العافية، على فَطْنة، شو كانت الجورَعة السّنة؟

هو: والله مَلْطَشْناها مَلْطَشة كُلّو جاهز عالسّريع (تِيكْ أوي) مناقيش، فول، حُمّص، فلافل وْشَوَرْما.

هي: يا عيب الشّوم عليكو، كسرتوا خاطري، وْسَوّدتوا وجهي قُدّام العالَم!

هو: دعيني أردّد مع العندليب الأسمر: لا أنا عارف أرتاح/ وانا تايهْ سوّاح/ وَصّيتَكْ وْصيّة يا شاهد

عليَّ/ تِحْكيلو عالّلي بِيَّ/ والّلي قاسيتو في لياليَّ...ّ

هي: وهنا نتطابقُ تمام الانطباق في لغة المثلّثات، حتى لو تباعدت المسافات، ومع التّحيّات لجميع أفراد أسْرتي الكريمة، من زْغيرو لكبيرو، بدون تسمية، وانا سكّرْتْ الخط وستلتقي.

هو: إرْحَمْني وْطَمّنّي وافتحْ لي باب قلبك.

هي: ليليّة عَمْ بَبْعَثْ ورْقة تِطْفي لهيب الحرْقة.

هو:ْ يا مرسال المراسيل وَصَّلّي بْدربَك هالمنديل، منديل الحِلُو.

هي: لا تنْسَ أن نترحّم على أرواح فنَاناتنا وفنّانينا الّذين يجبرون بخاطرنا، وطول العمر للباقين معنا، وْما فيه حدا

هو: ناطرْ عالبوّابة بَسْتَنّى أغلى حْبابي

هي: قُلنالَكْ ما فيه حدا

هو: ليش بَصْلَتِكْ محروقة يا بنت الحلال، إسمعي أحمد شوقي وعبد الوهّاب:

مُضْناكَ جَفاهُ مَرْقَدُهُ/   وَبَكاهُ وَرَحَمَ عُوَّدُهُ

حيرانُ القلْبِ مُعَدَّبُهُ/ مَقْروحُ الجَفْنِ مُسَهّدُهُ...

هي: لا تعملّي حالَك صوفي لدرجة الجنون، إنتي مش سَرِيّ السّقطي، ولا ابن عربي، ولا الحلاّج، ولا رابعة العدويّة ولا تِحْلِف بيوسف الصّدّيق الّلي باعوه إخوّتو، ولا تْخاطِب النّجوم! يا لطيف شو بِتْحِبّ الثّرثرة والعَجِنْ والَّلَتْ والّلعي، كُل ما سَكَّرْتِلَّكْ باب، بِتْقولّي: باب البوّابة بْبابين سُكَّرة وْمفتاح وْقِفتين!

هو: ميجانا ميجانا/غابَتْ شمس الحلوْ ما جانا/حيّاكْ بابا حيّاك/ ألْفْ رحمة على بَيّكْ/

هَذول العذَّبوني هذول المَرْمروني/ وْعلى جِسر المْسَيَّبْ سّيبوني.

هي: بِكَفّيك تبكي وِتْنوح مع ناظم الغزالي، وْإذا زَوّدتها، حَسيبَكْ للزمن وْما تْقولْش يا غايبين طَوّلْتوا الغيبة علينا!! فكِّر بغيرك! شبعنا حروباً وسفْكَ دماء وخراب ودمار!، قولي يا دار، دار يا دار وين سُكأنِكْ يا هالدّار!

هو: وَصّيْتَكْ وْصيّة يا شاهد عليَّ/تحْكيلو عالّلي بِيَّ والّلي قاسيتو بلياليّ.

هي: دخيلِكْ يا إمّي مدْري شو بِني/ أتركيني بِهمّي زَهْقاني الدّني، ودامَتْ لنا فيروزتنا الغالية في عطائها وسخائها: مشوار جينا عالدّني مشوار، شهد العسل جاب العسل مِنّ وين/ أني لَرُحْلو يَمّا:

 هو:ماما زمانها جايّة جايّة بَعْد شْويّة!

هي: مشوار بعيد وانا فيه غريب، وْإيْه الّلي جرالي سوّاح.

هو: أراني قدّمنا برنامج ما يطلبه القارئون/ات، أنا لَسْتُ بِمُجَدِّد ولا مُتَجدِّد، بل أنا مُقَلِّدٌ مُنْهَكٌ، أضْنيتَني بالهَجْر

هي: دعني أرُدّ على عتابِكَ الأوّل بالمثل: سنتين وانا حايل فيك والاسم حبيبي!عَمّال تِعْمَلّي حالَكْ ولد شاطر، بِصْغي لَمْعَلِّمتو، وْما بِحْكي سياسة، يمكن ثقلنا دَمّنا عالقرّاء، طَحْبَشْنا وهشّمْنا موازين الخليل وَعِنَب الخليل وَخَليلَيَّ، والأخِلّة: مطران، جبران، السّكاكيني وإنْدراوس الكفرساوي وْكُلّ الخلايلة معاً، نرجو المعذرة والمغفرة من الجميع: مع المحمّد َين  حلاوة وقنديل :

 سماح يا اهل السّماح/ لوم الهوى جارح/ أصْلِ السّماح طَبْعِ الملاح/ يا بَخْتِ مِن سامِح.

 والمسامح كريم يا فتّاح يا عليم!!

-هو: سافر مع السّلامة .... وْتِرجَع لنا بالسّلامة.