يا أوفير.. يا أوفير زيح .. زيح ..يا اوفير.. طير.. طير..!! إنت شو اللي عملته امنيح؟
..ادرت (البلدية ) بدون تدبير؟!!.
تع تنشوف يا جنرال.. شو اللي حصل؟
..شو اللي اتغير من الاحوال؟
..تركتم الشباب بدون عمل وبدون أمل. ولو شو السيره؟!! خليها بدون تجريح، حتى اطفالنا تركتهم بدون سحسليه مع وشوية مراجيح ؟ مستكثر علينا بستان؟!! يا اوفير في عهدك اتقلص العمران.
في عهدك زادت المحسوبيات بدل ما تكون في خبر كان . هاي الشغله ما بدها توضيح..قلنا هذا ما بعرف حد..رح يوضع الحد .. ويتصرف بجد ويكون أفضل من ابو الاميرالأول وابو الامير الثاني ؟؟.
ويبدأ في التصليح، ويبدأ في التجبير، ولكن خاب أملنا كثير.. كثير.
يا اوفير.. زيح ..زيح في عهدك زادت المخدرات والسرقات زادت سوء الاوضاع ..والشعب جاع وبدا يصيح.. حتى العكوب والزعتر صارت محميين من القانون الحقير! شوبدكم الاغيار ياكلوا تبن وشعير، فشرتم .. انتوا مش احسن من الناس، شيلوا من دماغكم هذا التفكير، العمال أشهر بدون معاشات..وين الضمير.. وين الضمير؟؟
يا أوفير فيق.. فيق في عهدك زادت الزعرنه والحريق ؟!! وحتى الاوساخ زادت على الطريق..والحفر صارت بير.. اتكسرت السيارات وعلى الرصيف طلع العشب والهشير .
بكفي، انكسر الابريق.. نشف الريق، ازهقنا نسمع معسول الكلام ..ازهقنا زرع اوهام .. فقنا من الاحلام يا اوفير.. بكفي سحقتونا حتى النخاع، .. ما عاد بدنا سراب لماع.. ما عاد بدنا حديث عن وحدة الدم والمصير.
بدنا انعيش عيشه ابيه زي كل البشريه، بدنا احترام بدنا وحدة حياة ..بدنا محبه وسلام بدل الحقد والاطماع، ازهقنا احتيالات وخداع ما عدنا نقدر انغض الطرف.انسدت حتى شبكة الصرف .. وما عدنا نقدر انسير بدون ما انسد المنخير ..
يا اوفير..الشغلة بدها وقوف؟
تع تنشوف، كيف"البيوف".. دمر رونق المرج الخضير ..وما عادت اتعبر عن هول الجريمة الكلمات والحروف.
يا أوفير أرجع لورى، صرنا انشم ريحة ال.... بدل ريحة الريحان وفياح العبير
الأوبئة انتشرت في الاجواء ..التربه اتسممت وزاد السرطان
عمت الاشجان وصار القلب كسير.. بكفي .. حل عنا يا اوفير.
ما انت زايح، فزيح بكير.
(ملاحظة:غابي اوفير هو رئيس بلدية الكرمل المعين)