.png)
-صباح الخير عمّي عبد الله، بِسَلِّمْ عليك بوي، بِسْأل خاطرَك: إذا كان عندك نبات عُرْف الدّيك، تِقطعلي كام غُصن، عندو حْصار بول، بعيد عنّكّ، وصفولو إيّاه، بفيد كثير.
-سَلّم ع َ بوك كثير! أهلا وْسهلا فيكْ وْفيه، موجود عّنّا من خير الله!بَسّ أنا مشْ دكتور، مِشّ عِزّيّي عنكو، تِكرم، هذا الطّلَب، بّسْ على عاتقو، وخوذ من عبد الله واتّكل على اللهَ الشّافي !
-السّلام عليكو يا عبد الله، الدّنيا الظّهر، واليوم الجمعة، طلبنا من العيلة دّقِّة كُبّة عالغدا، لا تِنْكَبّوا على غالي، كل شي عنّا جاهز لحمة معزى، هبرة، مدقوقة عَ الجُرن عالأصول، مع فليفلة حرّاقيّة، شُغل اليراكنة، بْتهري هَرِي، مع بقيّة التّوابع ما بخْفى عليكّ! ظَل ناقصنا شْوَيّة مردقوش، قالتلي العيال: هذا ما بِلْتّقى غيرعند صاحْبَك عبد الله! عُمرو ما عَزّ شي عن حدى، قريب أو غريب!
-بْتُأمُر عالرّاس والعين، وإذا ناقصك كمان شي، أهلا وسهلا، والجود من عند الرّبّ المعبود!
-ناقصني شيْ واحد فقط، تْفضّل تْغدّى معانا!
-مْعوّدين عَ فضالكو، إذا كان إلنا قِسْمة وْنصيب، مْنِتْشَرَّفْ!
-الدّنيا مسا، الله يمسّيكو بالخير! يا عبد الله وأهل بيتو، عجّلولنا بقهوة أهلا وسهلا، لو سمحتوا، ورانا شغل، كثير، بدنا نْجوّز الصّبي، عقبال عندكو! وْمحتاجين قرشين مصاري، معلومكو، المصاريف كثيرة!
-وْصلتوا، أهلا وسهلا، الغالي بيرخصلكوا، ناوليهُن يا بنت الحلال كُلْ شي في القبعة، هذا من العُبّ للجيبة، مبروك سلفاً، عقبال بقيّة الشّباب والصّبايا.
هوِتِفَ عبد الله قُبَيْلَ ساعات النّوم:أنا في طريقي إليكَ من بلدة...
-أهلا وسهلا فيك، ضيق المسا ما إلو عشا!
-وصفوني في عندك كتاب نَسْخ، خطّ إيد المرحوم الشّيخ....
-مضبوط! كلامك صحيح، شو المقصود؟
-قَدّيش بتريد ثمنو بعطيك بالدّولار نقداً!
-أنتي مش وجه فشل! لكن هذا الكتاب من ريحة الوالد، مش للبيعّ!
تفحّص عبد الله ضيفَه الّذي يدّعي المشيخة، وهي منه براء، كُلُّ ما يعرفه عنها هو: إنتعال الحذاء بدون جَورَبَين، أطلاق العنان لشاربَيْه وذقنه، كأنّهما محميّة طبيعيّة، تُفتح مرّة واحدة في كلّ شهرين، لِقَشّ الأغصان المتشابكة، وإطلاق العنان للشجرتين المقدّسَتَين على فيّالَيْهما، السّماء والبطحاء هما الحدود، يا شايف الزّول يا خايب الرّجا.
تنحنح الضّيف بشكل جهوري وابتسامة صفراء مفتعلة تُطِلُّ من المحميّة الطّبيعيّة بكثير من الوقاحة غير المألوفة: كون جَمَل وْحَمّل، لا تشفق علَيّ أبداً، خير الله كثير!عاد عبد الله إلى اتّزانه ورُشده: قُلنالك الكتاب مش للبيع، لو دفعت مال قارون، ولا تْواخِذْنا، وان ما عَجَبَكْ، خَيِّطْ بغير هاي المْسَلّة!
-عمّي عبد الله، بعثتني سِتّي جوهرة لأفضالك، مِشْتْهِيّة كوزين تين من تيناتَك المْشَكَّلات!
-أهلا وسهلا فيكي وفي ستّك، هاي علبة بلاسْتِك، فوتي عالكَرْم، إيدِك إلِكْ، حدّ كل تينة عقفة، حَوْشي إللي بدّك إياه، صحتين وْهنا، مطرح ما يسري يمري.
-سيدا عبد الله بيسلّم عليك الوالد كثير، انقطعنا من الزّيت، والموسم عَ البواب، بدنا رطل زيت، إعتبرو مُشْترى! ! دين! قِرْضة! إللي بدّك إيّاه !
-الزّيت إذا إحتاجوه أهلو بِحْرَمْ عَ الجامع، وانتو أهلنا، بدل الرّطل خُذي رطلين، وْكُرمال عين تكرم مرجعيون!
-قالت القرينة : والله بتبيّض الوجه يا عبد الله! عُمْرَكْ ما ردّيت حدا فاضي، الله يْفَيِّض الخير عليك، يا ابن الحلال!
-قولي الله يفيّض الخيرعلينا، وما في جود غير من الموجود !
-الله يرحم جدودك! هيك بيقولوأ أهلي، ع َالشّلوش بْتِنْما الشّجريّة، والشّجرةإللي ما بتفيّي عَ عرقهاّ حَلّ قطعها !
-تْفضّلي أطلبي ! عمرنا ما عزّينا غرض موجود عن حدا، الدّنيا قرضة وْدين، وأفضال أهْلِكْ سابقة علينا وْعَلْ الجميع، الغالي بِرْخَصِلكو!
-والله مخجولة منّك، مِش طالعة معي أطْلب منّك!
-لا تخجلي يا بنتي! فوتي لَعند صليحة، ما بتبخل عليكي بشي أبداَ !
كفكفتْ هذه دموعها المدرارة، وانصرفت مجبورة الخاطر حامدة شاكرة، لسان حالها يقول: بعد الدّنيا بألف خير!
جلسة أصدقاء وخلاّن جمعتهم معاً في مناسبة واحدة، وَجّهَ البعض أنظارهم نحوه، قال كبيرهم عمراً: شو السّيرة يا عبد الله! مش عمّالين نشوفك، خير إنشالله!
-أحنا بين الأيادي، سامحونا على قصورناّ!
-هات ما عندك بالتّفصيل المُمِلّ!
-بلدنا بعدها بألف خير، أن خِلِتْ بِلِتْ، معظم أهالينا عبيد الله معاَ، مِشِ بَس في عبد الله واحد عندنا، كلكو سبّاقين عَ الكرم والجود، هاي حسّاسيّة عندكو في الجلود، وأنا بَتْعلّم منكو، أنا أرعى قي حصيدكم، ألتقط ما تُبعثره مناجالكم الماضية كَحَدّ السّيوف!
-دَعْكَ من المجاملات!
-لا مجاملات ولا مُراعاة خواطر! خلّينا مثل أبناء حارة الضّبع في مسلسل باب الحارة، بِجُزْأيْهِ الأوّل والثّاني، كل واحد منكو: أبو صالح، العقيد أبو شهاب، أبو عصام، أبو حاتم، أبو بشير، أبو خاطر، أبو إبراهيم، مُعْتَزّ، عبدو، مْسلّم، ودوري أنا هوالحارس أبو ماجد، أو أبو فارس، ما عندنا والحمد لله، لا أبو غالب، ولا أبو بدر!
-بعدت كثير يا عبد اللهّ! وين شَرَدِتْ!
-لن أنسى دور أبي سليم( محمد قنوع) الذي ضحّى بابنه اليافع، كي يحجب سفك الدّماء مع أهالي حارة الماوي، رغم تحريض الجواسيس المدسوسينَ.
-وْعندك وقت لهيك حكايات ومسلسلات!
-هذا هو تراثنا وهذه هي أمجادنا في الشّام العذيّة، ولن أنسى دور النّساء الرّائدات: أمّ عصام وكريماتها، أم حاتم وكريماتها، والقائمة طويلة، كما تعلمون، وْشوفوا شامنا عن قُرْب، والّلي سبق شّمّ الحّبّق!
-قَلَبْتِلْنا السّهرة عن الشّام يا عبد الله!
صوتُ عبد الله جِرِشْ بِرمي الدّبّ عن راس التّوتة، ورغم ذلك رتّل بصوت نشاز:
الله يْحَيّي رْجال تمشي وْتتمايل بِسْلاحا/ وْبتدافع عن أهلا وِبْتفديهم برواحا
بَدّْنا نِعشق بدنا نْحِبّ/بدْنا نمشي كلّ الدّرب/بدنا نتعلّم الرّْجولة مْنِ القلب
شوفوا شامنا عن قُرْب....
-والله يا عبد الله! حِبّ حبيبك لو كان عبد إسْوَد!
-وانتي قُلتها يا بو شهاب المحلّي!
-مِنْ ثِمِّكْ أحلى يا كحلة
-عمّي عبد الله بسلّم عليك بوي....
-تْفَضّل عمّي وْصِلِتْ! هذول كُلّهُنْ عموميّتَك عنوان الكرم والجود!
-يا سبحان الله يا عبد الله، طَبْع الَّلَبَنْ ما بِغَيّروا غير الكَفَن!
-أنا ترباية الأجاويد مْثالكو!! وانتو العنوان!
.png)
.png)
.png)
