يا لَيْتَهُ اللِقاطُ الأخير

تَعِب هذا من اللف والدّوران في دوائر مغلقة ومتاهات لا نهاية لها، خرج إلى المجهول يبحث عن المستحيل والأوهام في هذا المساق الصّعب، صوت خفيّ هاتفه من بعيد: هوّن عليك أيّها الضّال! عندي بُشرى سارّة لكَ، تُهدّئ من روعك وتعيدك إلى جادة الصّواب في العقاب والثّواب!

 -ها أنذا بين يديك، أحسنَ الله إليك!

- عندك رافعة البحث، تختار منها أرَقَّ الأشجان والأحزان!

-خَفّف عني أثابك الله وأحسن جزاءك وعطاءك!

-إليكَ هذه التّشكيلة من البحث عن ضالّتك المنشودة، ولا تَنسَ شكر من كتبها ونظمها وناحها وندبها ولحّنها، لأنّ ذاكرتك الواهنة لا تسعفك على الحفظ والاستذكار:

* قيل في البحث عن الوطن والوطنيّة:

يا مَن ذبحتوا الوطن عا صيحة الأوطان/

وْكُرمال مركز مسحتوا كُل أمجادو

مِن شان الله اعْقلوا وما تعملوا خوثان/

الوالد ما ربّى الولد تَيكون جلاّدو/

إن عشتوا بْأرض الكرامة حبايب واخوان/

بيطوف خير الزّرع عا رفوف حصّادو/

بَسّْ إن حرقتوا الوطن بالنّار وِالدّخّان/

بَدّو يِجيكو وقتْ تِبكوا على رْمادو/.

*دنيا غريبة:

دِنيا غريبة كلاّ ظُلِم بِظلم/

 اصْبر يا غالي غيب عنها جاي/

لا بدّ تُفرج وْينتهي هالظّلم/

رَبَّكْ كريم يْدَبّرها هداتو.

*راح الْكان:

راح الكان لَحالي يِداري/

وْصارتْ وِحْشة عْتابِكْ يا داري/

 والله يا دار فْطِنِتْ بِحالي/

يا رَبّ تْردّ وِلفي من الغياب.

*الدّار الجميلة:

الدارُ ليسَتْ بالبناء جميلةٌ/

إلاّ أنّ الدّيارَ جميلةٌ بذويها/

قد يعشق الانسان أسوأَ بُقعةٍ/

ويزورها من أجْلِ شخْص فيها.

*نَبْع الهوا:

نِشِفْ نبع الهوا وْما رويتْ غِلّي/

وْجَفًّتْ أرضنا وْما جَمَعتْ غِلّي/

وِبْرمش الجانح الدّنيا غِلّي /

حتّى سَمّعِكْ دَقّ القصب.

*عمّار بن ياسر

هو صحابيّ جليل، له حظوة عند الرسول والموحّدين، وليس صدفة أن يُلقّب الرئيس ياسر عرفات نفسَه بأبي عمّار، على أمل أن يُرزق بابن يُسمّيه عمّاراً، فيكون: عمار بن ياسر تيمّناً، أحد الشعراء رثى أبا عمّار قائلا:

تقدّم يا حَرَسَ الشّرف ياسر/

وْسِرّ الرّاحل مدفون أه ياسر/

شهيداً شهيداً رحل الرّمز ياسر/

صبراً يا آل ياسر عالغياب/

نِحمي وِنْبوس ترابَكْ يا بو عمّار/

*جُرّي يا ربابة

جُرّي يا ربابة بَسْ جُرّي/

على الّلي غْيابو للدمع جَرّى/

عَجَبْ يا جَمَل تِحْمل ميْةْ جَرّة/

وِانتْ عطشان بِصحرا اللهب.

*على الأحْباب

أنا يا دَمع عيني غيم كانون/

على مَن شَيّلوا وْبالبيت كانون/

وْيا قلبي عا الحْبايب مِثل كانون/

الأهل يِضِرْموا فيها الحَطَب.

*الشّاعر المعطاء: سلمان زين الدّين/ البقيعة /قال:

بَكّير غِبِتْ عنّي، شو كِنِتْ مِتْمَنّي/

الحياة نقْضيها إنْتْ جَنْبْ مِنّي/

اشْتَقْتِلَّكْ يا غالي يا عِزّي وْدلالي/

وأضاف سلمان قفلة ثانية:

ودّعِت إمّي وِتْيَتَّم يا إمّي الدّار/

وِابتدا همّي وابتدا همي/

يا زهرة قلبي والرّوح مِشْتهي ضَمّة/

عا الفبر قاعد مجروح وْمحترق دمّي/

داريْتِك يا إمّي سْنين بِرموش عيوني/

مِن عينيكي الحلوين راحوا وتركوني/

لو فِيّي بَرِّد دمّي وْبوس كفوفك/

بِدْفَع عمري يا إمّي تَإرْجَع شوفِك/

 يا قلبي وْيا أغلى من حالي.

*وقال غيره عِتاباً ورجاءً:

دَخيلَكْ يا قَدَر خُذْني لَحَدْهُنْ/

الغوالي وْجاوْروا لَحْدي لَحْدْهُن/

والله كإنّي يا دَهر حاجي لَحَدْهُن/

غَدْرَكْ ما تَرَكْلْنا حْباب.

*بُعْد وشكوى:

حْبابي القَدَر عن عيني بَعَدْهُن/

وْتركني أشكي اللوعة بَعْدْهُن.

*سعادة وتعب:

ما يسعدني غير عينَين هِنْ هِنِّ/

وْما يتعبني غير عَينين هِنْ هِنِّ/

سود البراقع يِفْتِنَنِي هِنْ هِنِّ

*تِعْب المشوار:

تِعْب المشوار مِن خطواتي وْخطواتَكْ/

وِنْسينا الدّار وِالزِّوّار نْسيناهُم/

يا دار على ويْن الدّرْب مْودّينا/

وْعلى أيّ شَطّ مْرَسّينا/

يا بحر اتْرِكْنا عالمينا خَلّينا زْغار.

*جور الليالي:

نُصْبر على جور الليالي وِالأيّام/

وْبين الحنايا هَمّ وِالغَمّ مَكبوت/

نَصبر ونصبر والمسار قُدّام/

وَلا عاد يِنْفع يا ولد زعقة الصّوت/

خطوة تْودّينا على حَدّ الأوهام/

وْخطوة تْروح هْناك للموت.

*همسة عتاب:

صافيني وْلا تْجافيني وْيا محبوبي الغالي/

وْناديني وْحاكيني وْلا تتركني لَحالي/

عْيونِكْ لا تْبَكّيها لَإنّكْ ساكن فيها.

*دموع العَينَين:

عيوني الدّمع عا الهجران صفّوا/

وْجا بِقربي أعَزّ النّاس صفّوا/

والله يا ناس اسْألي حْبابي وين صَفّوا/

تِجْرح خاطري رَدّ الجواب

*حوار بين مثقّف وراعٍ:

-لِسّاتَكْ بالغنم راعي/ وْسارق أرض المشاعي/

وانا عالقمر الصّناعي/ فَرْجيتَكْ الشّاشة ألوان

-بالغَنَم بَهْوى الرّعيّة/ مِن زمن جِدّي وْبَيّي/

مِن قَبِل رَعى نبَيي/ وْشاشتك من طبيعتي ألوان

*حاكورة بيتنا:

على حكورة بيتنا خُذْني وْوَدّيني/

مِشْ طايِقْ قَعِدْتي بْعَجْقِة هالمْديني

*طَوَّل الهجران:

يا قلبي الطوّل الهجران دينو/

إذا ما سَدّ للمحبوب دَيْنو/

لَو في شي يْعَوِّف الإنسان دينو/

هوْ ظُلم الحبيبْ عْلى الاحْباب

*الأصالة والنّبالة:

وَالله جابَتْ لي لَبَن/ وْقالت لبن ذوقْ/

وْعُمْرَكْ لا تِشْكي هَمّكْ لَبَنْدوق

*حنين وأنين:

راحِ الكان ليلْ نْهار يِعِن لي /

والله لقاكْ عالبال يِعِن لي/

عَسى تْظَلّكْ جَنْبي دوم تِعِن لي/

وْيمين الله ما نِنْسى الحْباب

*عن الوفاء:

مو كُلْ مَن مشى وَيّاك صاحب/

ولا كُلْ مَن دَقِّ الصّدر قَدّها/

في عندك ناس تِحْكيلَك بطولات/

وْذَرّة مْنِ الوفا ما تِلقى عندها

*أمل وألم:

والله ما زالوا هالفلب بالحُب أوْرَقْ/

شو بَدّي مْنِ البحر إن هاج أو راق/

والله مَهلوني لَحَتى عْمِلت أوراق اللقاء/

وْغافلوني بالغياب يا ويلي

*كِرام النّفْس:

يا يابا كِرام النَّفْس روحي ما تْمِلْهُمْ/

وْعلى الفِرْقة تعبنا ما تَم إلْهُم/

قَلْ أنا شْبَدّي عالزّمان إلّلي ما تَمّ لْهُم/

رحلوا دْيار ظلّتْ خَراب

*قَسَم ما أنساك:

حبيبي ما أنساك لو صار العُمر عُمران/

بْرحيلَكْ هَدّيت يَلّي كان عَمران/

غْيابَكْ جاب للورد العَطَش

*الأمّ والأب معاً:

أحِبْ إمّي الحنونة كيف ما كانت/

وْفيها زايد وجودي مكانات/

واحِب أبوي تَكْسب منّو مكانات/

حجار الزّاوية ما تِعاب

*أبو عرب السّجراوي:

يا يُمّا في دَقّة عَبابنا/ يا يُمّا هاي دَقّة حْبابنا/

يا يُمّا هاي دقّة قويّة/ يا يُّما دقّة فدائيّة/

يا يمّا عُشّاق الحرّيّة/ يا يمّا بِدُقّوا عَبْوابنا/

يا يمّا هذول النّشاما/ يا يمّا هذول طلاّب الكرامة/

يا يمّا صرنا يتاما/ يا يما هذول الغوالي/

يا يمّا هذول طلاّب المعالي/ يا يمّا سِهروا الليالي/

يا يمّا تيحرّروا بلادنا/ يا يمّا هذول إخواني/

يا يمّا هُم نجدة أوطاني/ يا يمّا بِضَحّوا من شاني/

يا يمّا اتْقَطَّعَتْ رِجْلَيّ/ يا يمّا بَفْديهُم بِيدَيّ/

يا يمّا طْلعنا بالبرّيّة/ يا يمّا بِتْهِزّ اعصابنا/

*عن عمى الأب:

وْحَقّ الله يا ناس صُرْت ما شوف بعيوني/

بَعِدْكُمْ حسافة الزّمن من يَمّي بَعِدْكُم/

يا عيني أريد أسْأل تِحِبّوتي بَعِدْكُم/

أخاف البُعِد غيّرْكُم عليّ يا الغالي/

*ضربني الدّهر عَ جْبيني عما لي/عْيوني وْعطّل علَيّ اعْمالي/

أنا ما بْكيت بهالدّنيا عا مالي/كُثر ما بْكيت عا فْراق الحْباب/

*وداع الأمّ:

ودّعِتْ إمّي وِتْيَتَّم يا إمّي الدّار وابتدا هَمّي/

يا زهرة قلبي والرّوح مِشْتهي ضَمّة/

وْعالقبر قاعد مجروح وْمِحْتْرِق دمّي/

دارَيْتِكْ يا إمّي سْنين برموش عْيوني/

لَكن عينَيكي الحلوين راحوا وْتركوني/

لَوْ فِيّي الدّربْ كَمِّل وْبوس كْفوفِك/

بَسّ عُمري يا إمّي تَإرْجع شوفِكْ

*مكتوب شكوى:

يا مكتوب روح وارْجاع/ حاجي تزداد الإوجاع/

همومي مِن كل الأنواع/ عَلّي راحوا وْشيّلوا/

طَوّلوا حْبابي عْلَيّي طَوّلوا/ ما لي قُدْرة اتْحَمّل/

        لَوْ قِدروا يتْحمّلوا

*موج البحر:

يا موج خذني معكْ/ يا بحر غَرّقني/

لَنّو محبوب الفلب/ هالسّاعة فارَقْني/

*موّالان من عنبال الكرمليّة:

-مْرقتي مرقة النّخلة عَ سلسال/ابْتسمتي وْمن شْفافِك العسل سال/

بْكيتي والدّمع زَح عَ سلسال/ وانْطَحَن اللولو بالذّهب/

-تَعا يا ليل نِشْكي بَعِدْهُم/ ما عاد القلب يتحمّل بُعدهم/

لَكْ مْصيبة على حْبابي نعشق بَعِدْهُم/ وْحرام يْطَوّلوا علينا الغياب/

*حنين وأنين:

-عَبالي ضُمِّكْ يا حنونة/ وِالمِسِكْ شَمّيت ريحة عطر فيكي/

كُلْ مِن سَلَّمْ عَ ديّاتِك/ لَو مليون علّة بِجسمو طاب/

-مَرّيتْ عا دار الوِلف حَيّيها/ سَلّم عليها وْسلّم عَ أهاليها/

يا ناس ما كان حُبّي لأجل هاك الدّار/ لَكِن لأجل الحبيب الّلي سَكن فيها/

*عن البكاء:

-لا تِبْكين خَلّصتي الدّمع يا عين لا تبكين/

ما ينفع البكا لو بكيت يا عين سْنين/

*مشتاق للحبايب:

قلبي شو مشتاق للحبايب/ والله يا محبوب قلبي ذايب/

وْمِن وقت ما إنْت عنّي غايب/وْعيني ما تشوف غير حلاكو/

مسكينة مِن هجري وحالي/ صيْتَكْ يا وِلِف لاحق بالي/

لحظة ما نْساك ساكن بالي/يا عشير الرّوح ما بِنْساكو/

عزاء الزّيتون:

والله ياهْل ما يوم واحد عزّيتوني/ ولا بْشدّة حْزاني عزّيتوني

والله لاكْتم قصّة حْزاني عالزّيتونة/ الْتَحْت فَيّاتْها شُفْتِ الحْباب

*غزل رقيق:

لا تسالوني عالبِحبّوني سِرّي مفضوح/

ناري مجنونة جُوّاة جْفوني وْفلبي مجروح/

بْقلبي خَبّيت سْراري فيها يا ناري/

لَكِن بعيوني دمعة مجنونة ِبْتيجي وْبِتروح/

*نداء القبر:

يا قبر تْرفّقْ بْهالْخِل الّلي حَلّ فيك/

وْبعدو يا المصايب صْرْتْ حِلّ فيك/

يا دنيا بَدّي بْراعي الكون حَلّْفِكْ/

فِيّي تُرفضي بِكَفّي عذاب

*جرح القلب:

انْجرح قلبي يا إمّي بْهيكْ أمِّة/ كإنّي عايش بِهالكون أمّي/

خُذوا روحي وادْفنوني حَدّ أمّي/ أهْوَنْ مِن دِني مْرار وْعذاب!

*حين تعول الأسْرة معاً:

يا يُمّا يا يُمّا ياب يابا، يُمّا عَيّشَ الله لا تموت، وْتِدْفَع عنّي السّيط، ترى إن تْروح منّي ما يِتْحمل ونّي، والصّرخة مِنّكْ تِخَلّي القلب تابوت، يُمّا دوسي على جرحي، وْخَلّي العين تِعاتبنا، والله يا يُمّا غْيابِكْ زلزل، الفلب وْفَتّح مواجعنا، يُمّا حَطّيت حِملي وْكَرْكَريتو، وْما ظَلّ واحد ما نَخيتو، حتّى العليه العَتَب أنا نخيتو، يُمّا شَدّ الهوا حرّك الباب، خَسْبا لي يُمّا جَيِّت الحْباب ، يُمّا شُفْت القُمر لِنّو يِطْلع، وِالشّمس عَ الرّاس تِشْقَع، يُمّا شفت الهوا حرّك الباب، وْلا نِمِتْ سَنة وْلا نام جاري، يُمّا ثاري الهوا والباب كذّاب، يُمّا يا يُمّا ياب!

 ومهما أقْلعتُ وأبحرتُ وطُفتُ وجلتُ وحلّقتُ وهبطْتُ، يبقى نثر نزار قبّاني يٌجلجل في أذنَيَّ ليل نهار:

ليسَت كُلُّ امرأة تُنْسى بامرأة أخرى، هنالك امرأة لو ضاعت مِنْك ستقضي بقيّة حياتِكَ تجمع صورتها من ألف امرأة، ولن تنجح!

ويا ليته هذا هو اللقاط الأخير، (كالعشاء الأخير)، من مروجنا وخلالنا وتلالنا وجبالنا العامرة بمبدعيها الذين غاب عنّا معرفة أسمائهم لنشكرهم، ويُصَحّحوا لنا ما وقعنا به من أخطاء وزلاّت